KUCHING, 31 Oktober: Pemidang Sapit Kepala Menteri Tan Sri James Jemut Masing pengelenyau ke pemadu besai tebal agi ngagai komuniti Dayak.
Ku Kaban Kunsil Nengeri (ADUN) Layar, Dato Gerald Rentap Jabu madah, pemidang Masing siti berita ke balat ngenyitka ati lalu siti pengelenyau ke besai ngagai rayat Sarawak.
“Niang tu siku tuai politik enggau tuai raban bansa ti chukup manah. Iya seruran chakah mantaika buah runding tebal agi pekara ke ulih mai pemaik ngagai komuniti Dayak ti nyengkaum bidang pelajar, pengarap enggau penyerakup raban bansa.
“Nya alai, aku chukup sinu ninga berita tu. Aku mantaika penyinu ati ngagai bini niang, Dato Corrine enggau sida sebilik,” ku iya madah lebuh dirandau pengaran berita TVS.
Sapit Kepala Menteri Sarawak, Tan Sri James Jemut Masing udah nadai urung pukul 7:05 pagi tadi.
Kena 28 September ke udah, Masing ke beumur 72 taun dipasuk ke Unit Intu Siru (ICU) Sepital Besai Sarawak (HUS) sepengudah ditetapka positif COVID-19. Presiden Parti Rakyat Sarawak nya dipasuk ke ICU HUS sepengudah ditetapka positif COVID ba bulan siti nyin suba.
