KUCHING, 31 OKTOBER: Sekeda menteri enggau pengari rayat Sarawak mantaika penyinu ati sida sepengudah nerima berita pemidang niang Tan Sri James Jemut Masing.
Menteri Dagang Dalam Menua enggau Pekara Bebelika Barang (KPDNHEP) Datuk Seri Alexander Nanta Linggi mega ngenataika penyinu ati ngagai niang sebilik.
Nanta ke mega Sekretari Besai Gabungan Parti Sarawak (GPS), Datuk Seri Alexander Nanta Linggi madahka, niang udah mayuh mai pemansang ba nengeri tu sereta dikelala siku tuai ke chukup ngemeratka penyerakup rayat Sarawak.
“Aku udah ngelala niang chukup lama lalu tebal agi kami sama asal ari Kapit.
”Budi enggau pemanah niang endang dikeingat belama sereta nyadi inspirasyen ungkup komunti Dayak. Iya siku tuai tauka mentor ba dalam bidang politik ke dipebasa sereta ngembuan mayuh peneleba,” ku iya madah.
Tan Sri James Jemut Masing mega Kaban Kunsil Nengeri (ADUN) Baleh diripotka nadai pagi tadi ketegal bisi penanggul pengerai sepengudah ditetapka positif COVID-19.
Niang mutuska seput ti kepenudi urung pukul 7.05 pagi tadi di Normah Sarawak Medical Centre, Kuching.
Nangkan ke nya, Menteri Kaunsil Kandang Menua enggau Pengawa Berumah Dato Sri Dr Sim Kui Hian madahka, niang Tan Sri James Jemut Masing, siku tuai ke chukup ransing enggau bebendar mai pemaik ke Sarawak.
Iya madahka, pemidang niang pengelenyau ke chukup besai ungkup Sarawak.
“Aku ngenataika penyinu ati ngagai bala niang sebilik.
“Sarawak udah lenyau siku anak Sarawak ke chukup ransing bejalaika pengawa ungkup pengelantang rayat Sarawak,” ku iya madah nengah Facebook sehari tu.
Dr Sim ke mega Presiden SUPP, madahka, iya temegah ati laban udah kala gawa begulai enggau niang sebedau tu.
“Aku chukup temegah ati laban kala gawa begulai enggau niang, belajar mayuh pekara enggau peneleba ngelamatu,” ku iya madah agi.
