KUCHING, 31 OKTOBER: Sapit Kepala Menteri Sarawak, Tan Sri James Jemut Masing udah nadai urung pukul 7:05 pagi tadi.
Kena 28 September ke udah, Masing ke beumur 72 taun dipasuk ke Unit Intu Siru (ICU) Sepital Besai Sarawak (HUS) sepengudah ditetapka positif COVID-19.
Presiden Parti Rakyat Sarawak nya dipasuk ke ICU HUS sepengudah ditetapka positif COVID ba bulan siti nyin suba.
Kelimpah ari nya, Masing diripotka udah nerima dua dos vaksin COVID-19.
Kena 31 Mei ke udah, madi lelaki iya, Jantai Masing, 68, mega nadai ketegal COVID-19 , sehari sebedau pengerami Hari Gawai.
Maya nya, Masing madahka madi iya nya ulih gerai enti sema udah nerima tuchuk vaksin COVID-19 laban anak Jantai, Kudi, ke ngibun apai iya udah nerima vaksin.
Masing ada kena 5 March 1949.
Iya ngembuan Ijazah Sarjana Muda Pendidikan ari Victory University, Australia berengkah nelebaka diri ba dalam bidang politik taun 1986 nengah Parti Bansa Dayak.
Ba taun 2004, Masing numbuhka Parti Rakyat Sarawak (PRS) iya nya siti parti ba baruh Barisan Nasional sebedau nyereta Gabungan Parti Sarawak pada 2018.
Ba Pengawa Bepilih Nengeri (PRN) Sarawak taun 2016, iya mujur ngenan kerusi DUN Baleh lebuh menang besai enggau majoriti 4,793.
Maya nya iya mujur bulih undi 5,272 ti dibanding enggau Agop Linsong ari DAP ke semina bulih 479 undi.
Ba PRN 2011, Masing mega menang besai ba kerusi nya lebuh bulih 5,452 undi ngalahka pengari Pakatan Rakyat iya nya Bedindang Anak Manjah enggau majoriti 3,898.
Niang berengkah nyereta Perintah Sarawak ba taun 2011 lebuh dichiri nyadi Menteri Pemansang Tanah nyentuk ke taun 2016.
Sepengudah PRN 2016, iya diberi tanggungpengawa baru ke lebih besai iya nya nyadi Sapit Kepala Menteri.
Kelimpah ari nya, Masing kala megai sekeda potfolio bukai iya nya Menteri Pemansang Infrastrakcha enggau Perengka Pengangkut.
Ba taun 2017, iya nyadi Menteri Infrastrakcha enggau Pemansang Penyangkai Sarawak.
