KUALA LUMPUR, 29 OKTOBER: Agih Belanja 2022 deka nyendiaka sepenyampau RM332.1 bilion ti mandangka agih belanja ke pemadu tinggi diungkupka ti dibanding enggau agih belanja bukai sebedau tu.
Menteri Pekara Wang Tengku Datuk Seri Utama Zafrul Tengku Abdul Aziz lebuh mantaika Rang Undang-Undang Perbekalan (2022) di Dewan Rakyat madahka, ari penyampau nya perintah merambu deka nyendiaka RM233.5 bilion ke diguna nyadi belanja ngatur, RM75.6 bilion ungkup belanja pemansang enggau RM23 bilion ba baruh Raban Wang COVID-19.
“Sepenyampau RM2 bilion mega disediaka perintah ke nyadi duit simpan luar jangka.
“Taja pan tu agih belanja ke dipeda ngerembai, defisit fiskal 2022 dianggarka kurang ngagai 6 peratus ari KDNK ti dibanding 6.5 peratus ba taun 2021,” ku iya madah.
Zafrul nerangka senentang Agih Belanja 2022 ti diseririska ngagai Pelin Malaysia Lumpar ke-12 dilangkar nyadi penyambung ari pakej bantu enggau penyungkak ekonomi sebedau tu.
‘Pakej tu dikemanahka agi sereta disikap pekara baru dikena numbuhka Agih Belanja ke mungkur semua, tegap sereta sebela,” ku iya madah agi.
