BAU, 29 OKTOBER: Perintah nengeri Sarawak udah ngungkupka semak RM1 juta dikena bejalaika projek nupi chapi dagin enggau ngaga kandang di Kampung Merembeh.
Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas nerangka, projek chapi dagin nya diungkupka sepenyampau RM400,000 nya ngaul 30 iku pesereta di Kampung Merembeh lalu nya bantu khas ari perintah nengeri dikena mantu orang betupi ngemansangka projek betupi seraya nambahka asil penatai pemisi sida.
“Ungkup projek nupi chapi nya, perintah deka nyendiaka bekal 150 iku chapi ari sekeda bansa ke diberi nguna chara pawah (pinjau) nengah Program Pawah Chapi enggau 30 iku nguna chara geran ba baruh Program Geran Bansa Jelu Tupi.
“Chapi pawah 120 ekor tu mesti dibayar pulai nguna anak chapi ke beumur 12 nyentuk ke 24 bulan dalam timpuh enam taun,” ku Uggah madah lebuh bejadika Projek Nupi Chapi Dagin DUN Serembu.
Uggah ke mega Sapit Kepala Menteri madahka, ungkup nya dikena nyendiaka tanah (land clearing and preparation), meli perengka, mesin sereta ngaga “shed” endur nyimpan mesin.
Kelimpah ari nya, iya madahka ungkup sepenyampau RM500,000 dikena ngaga kandang chapi nya ukai semina janji beserimbai enggau pengawa bepilih ti deka diatur enda lama agi.
Iya nyemetak madahka, nya endang sebagi ari tanggungpengawa perintah ba baruh Gabungan Parti Sarawak ba baruh iring Datuk Patinggi Abang Johari Tun Openg.
“Industri nupi jelu dagin ngembuan potensi besai dikerembaika di serata Sarawak taja pan penyampau semua chapi nya semina 18,000 iku aja iya nya dipeda kurang ti dibanding enggau nengeri bukai,” ku iya madah agi.
