KUCHING, 29 OKTOBER: Bisi 55,017 iku peranak di Sarawak udah nerima dos penyungkak vaksin COVID-19 naka kemari.
Sapit Direktor Pengerai Nengeri (Pengerai Mensia Mayuh) Sarawak Dr Rosemawati Ariffin madahka, vaksin nya diberi pechuma ba klinik enggau sepital peribit, klinik pengerai, palan meri vaksin (PPV) perintah enggau nengah chara mindah kin kitu.
“Opis Pengerai Nengeri Sarawak terus meransang sida ke patut nerima dos penyungkak vaksin COVID-19 tu sereta udah nerima jam enggau hari bulan nengah MySejahtera ngambika datai ngelawa fasiliti pengerai ke udah disediaka,” ku iya madah nengah siti penerang sehari tu.
Dr Rosemawati madahka, vaksin Pfizer BioNTech udah diberi pemendar bisi penetap meri dos penyungkak nya enggau sida ke udah nerima dua dos vaksin Pfizer dikemendarka ngambi dos penyungkak sepengudah lebih ari timpuh enam bulan ari hari bulan ngambi dos kedua.
Nangkan ke nya, iya nerangka senentang penerima vaksin Sinovac dos satu enggau dos kedua dikemendarka nerima dos penyungkak sepengudah lebih ari timpuh tiga bulan ari hari bulan ngambi dos kedua.
“Mensia mayuh ke bedau nerima vaksin nya ulih betelefon ngagai fasiliti pengerai ke bekaul dikena netapka jam enggau hari bulan ngambi vaksin penyungkak nya,” ku iya madah agi.
Sarawak berengkah meri dos ketiga enggau dos penyungkak vaksin COVID-19 nya kenyau ari 13 Oktober ke udah dikena nyaga raban ke napi risiko tinggi.
