PUTRAJAYA, 29 OKTOBER: Yayasan Kebajikan Siswa Keluarga Malaysia dilancharka Menteri Besai Datuk Seri Ismail Sabri Yaakob sehari tu ti nyadi sebuah ejensi ke bejalaika tanggungpengawa mantu raban nembiak universiti ke begunaka bantu.
Ngambi penerang ari Bernama, iya madahka dikena ngemunka pengawa nya perintah udah ngungkupka duit turu sepenyampau RM5 juta ngagai yayasan nya ti diagih nengah Opis Menteri Pekara Wang ke nyadi tanda sukung perintah nentuka operasyen enggau juluk penumbuh yayasan nya ulih nyadi nyata.
“Ejensi tauka gerempung tu deka bekerejasama enggau semua pemeri bantu enggau yayasan ke udah bisi ditumbuhka di institut pelajar tinggi (IPT) ti nyadi siti chara ngemudahka bantu diberi ngagai nembiak universiti ke begunaka bantu.
“Beduduk ari nya, aku ngelalau ejensi ke bekaul ngambi ngemudahka sereta ngelengkaska peminta ke diterima ari nembiak awakka bantu nya ulih diberi terus ngagai sida,” ku iya madah.
Iya mansutka jaku nya ba program ngelancharka yayasan nya nguna chara dalam tali arus di Facebook Opis Menteri Pelajar Tinggi (KPT) maya Hari Lima.
Ismail Sabri nyemetak madahka, penumbuh yayasan nya nyadi eviden perintah meri perati senentang pengelantang nembiak universiti baka ke ditetapka ba dalam konsep Keluarga Malaysia iya nya ‘Keterangkuman, Kebersamaan dan Kesyukuran’.
Berindik ari nya, nengah penumbuh yayasan nya, iya arapka pengatur enggau pengawa nyaga pekara bekaul pengelantang nembiak lebih tegap ti ngaul kerejasama semua seraya ngemeranka konsep Keluarga Malaysia.
Iya nerangka senentang Yayasan Kebajikan Siswa Keluarga Malaysia ba status ejensi rasmi renggat nasional nya ditumbuhka ba baruh Akta 258 sereta dikemataka Seksyen Pekara Undang-Undang Opis Menteri Besai.
