KUCHING, 29 OKTOBER: Siku peranak menua tu enggau dua iku peranak Indonesia ditangkap polis ketegal nyadi operator judi chara dalam tali arus kenyau ari dua bulan ke udah.
Ku Tuai Polis Pelilih Kuching ACP Ashmon Bajah nengah siti penerang madah, ketiga-tiga saspek ditan ba siti pengawa ngarap ti dipejalaika Raban Nagang Judi Dalam Tali Arus IPD Kuching ba sebuah apartment di Jalai Tun Jugah, Kuching kena 28 Oktober ke udah.
“Ketiga-tiga iku saspek nya beumur 22 nyentuk ke 42 taun dibayar gaji RM1,500 sebulan enggau tetiap operator dibayar bonus bepelasarka peratus penguntung ke diterima sindiket.
“Semua saspek betelefon ngagai pelanggan ti nyadi siti chara dikena bedajaka judi nguna chara dalam tali arus. Kelimpah ari nguna telefon, operator tu mega nguna aplikasyen enggau laman rama baka Whatsapp, Telegram, Wechat, Skype sereta Facebook,” ku Ashmon madah.
Asil tasat sebedau nya, tetemuka palan nya dibuka nguna chara syif ungkup timpuh 24 jam kenyau ari bulan Ogos 2021.
“Bepelasarka rikod enggau transaksyen penyampau untung kasar sindiket nya manggai RM1,000 sehari lalu penyampau semua untung ungkup timpuh dua bulan aktiviti nya manggai RM60,000,” ku iya madah agi.
Kelimpah ari nya, polis ngerampas mayuh macham perangka ti nyengkaum empat unit monitor komputer, empat unit CPU, router, modem enggau perengka bukai dikena sida bejalaika judi dalam tali arus nya.
“Ketiga-tiga iku saspek nya ditan ngambi bejalaika pengawa ke patut enggau keretas tasat udah dibuka ba baruh Seksyen 4(1)(g) Akta Rumah Judi Terbuka,” ku Ashmon madah agi.
