JULAU: Projek Jalai Besai Pan Borneo di Bagi Menua Julau dijangka dibuka bulan November tu.
Nitihka Menijar Projek Pakej Kontrak Kerja 07 (WPC07) Opis Zon Tengah, Unit Lebuh Raya Pan Borneo Opis Kereja Raya Sarawak Syahrul Ismail madah, jalai alun Pan Borneo ti ba pun ari KM1+500 pengudah Simpang KJD enggau Palan Pematih Pengajar Rajang nyentuk ke KM28+500 sebedau Jemtan Sungai Jikang nya ditu ba fasa kepenudi ngulihka Setipikit Perakuan Siap Kerja (CPC).
“Jalai alun tu sebagi agi jalai besai Pan Borneo Sarawak ti udah tembu digaga enggau CPC deka dikeluarka ngagai kunteriktor enda lama agi,” ku iya nambah jalai empat lurung nya udah dibuka penuh ngagai mensia mayuh kena 20 Oktober nyin tadi.
Iya dirandau pengarang berita pengudah Pengerami Penjanaan Sistem Lampu Isyarat ba Simpang Jalai Julau ari Kaban Kunsil Nengeri (ADUN)Meluan Rolland Duat Jubin kemari.
Ku iya madah, pengawa ngaga jalai besai pan borneo Julau ti berengkah kena 16 September 2016 enggau kereja ngaduka ‘cerucuk’ flyover simpang Julau berengkah ba bulan 2017.
Nangkanka nya, Roland madahka peranak ba sitak DUN Meluan berasai gaga ati enggau gaga berindik ari penembu projek nya.
Ku iya madah, tu laban jalai nya endang dianti peranak ba kandang menua nya.
