KUCHING: Sapit Pesuruhjaya Tinggi Bangladesh, Mohammad Khorshed A Khastagir nemuai meri basa ngagai Sapit Kepala Menteri, Datuk Amar Douglas Uggah Embas ba Opis Wisma Bapa Malaysia Kena Hari Tiga.
Bangladesh madahka besedia deka nangkup guna pekereja di Sarawak dalam mayuh bengkah sektor lebih agi ba sektor kebun bedandang besai.
Taja pia ku iya nambah, pekara nya dipejalai nitihka polisi entara kedua-dua menua enggau Bangladesh besedia nitihka kriteria pemadu baru Malaysia dalam nerima pekereja menua luar iya nya sida mesti udah betuchuk dua dos vaksin Covid-19.
Ku iya madah, ba keterubah sepenyampau 3,000 iku pekereja deka dianjung nangkup peminta guna pekereja nya.
Ba awak ke sama, Uggah madahka Sarawak begunaka mayuh pekereja lebih agi ba dalam sektor sawit.
“Kami ngelaluka mayuh agi pekereja ngambika mantu dalam pengawa betanam.Pandemik Covid-19 mai mayuh pemar ke enda kala nyadi sebedau tu nyengkaum kurang pekereja.” ku iya.
Berebak enggau nya, iya deka mai pekara senentang ngambi pekereja ngagai Kepala Menteri Sarawak ngambi ulih berundingka pekara nya.
Taja pia, pekara ti besangkut paut enggau pengawa ngambi pekereja ari menua luar bepanggai ngagai kuasa opis menteri luar nengeri di Putrajaya.
Kelimpah ari nya, Sarawak mega ngelaluka pemeranak puku dalam bidang betanam betupi moden seriris enggau juluk deka nyadi sebuah nengeri pengeluar pemakai beresi enggau produk pemakai manggai ba taun 2030.
