KUCHING:Menteri Perengka Pengangkut, Dato Lee Kim Shin madahka penerebai bilun ke Sarawak deka ditambah ari 89 penerebai ngagai 223 penerebai seminggu berengkah 1 November tu.
Berebak enggau nya, semua penerebai bilun iya nya Malaysia Airlines Berhad, Airasia Berhad, Malindo Airways Sdn Bhd, Scoot Tigerair Pte Ltd Enggau Maswings Sdn Bhd mesti madahka pejalai bilun sida ngagai Opis Penerebai Malaysia (Mavcom).
Ku Lee madah, nengah penambah bilun ari luar Sarawak ke Kuching ari 44 kali seminggu ngagai 114 kali seminggu lalu penerebai bilun ke Miri ditambah ari 19 kali seminggu ngagai 40 kali seminggu.
“Di Sibu, penerebai bulun nambah ari 8 kali seminggu ngagai 31 kali seminggu, Bintulu (6 kali seminggu ngagai 24 kali seminggu)Limbang enggau Lawas (lima kali seminggu ngagai 7 kali seminggu) lalu Mulu mengkang 7 kali seminggu,”ku iya.
Lee nambah, tang pemutus nambahka penerebai bilun nya diatu bepanggai ngagai serikat penerebai bilun ti ditimpuhka belabuh kena 1 November tu.
Ku iya nerang, penerang ke silik deka dipadah dalam laman web Opis Menteri Perengka Pengangkut Sarawak (MOTS) pengudah nerima timbal ari semua serikat bilun.
Sida ti deka ngulihka rega tambang bilun murah diperansang ngatur pejalai enggau ngulihka tiket tumu.
Nya alai, MOTS arap enggau penambah penerebai bilun tu nya ulih mutarka isu rega tambang bilun mar .
