SRI AMAN: Bisi 24 gerempung ba sitak Kunsil Nengeri (DUN) Simanggang udah nerima chek Projek Mit Pemansang Menua Pesisir (MRP), bedau lama ke udah.
Kaban Kunsil Nengeri (ADUN) Simanggang,Datuk Francis Harden Hollis udah nyuaka chek nya ngagai penerima sepenyampau RM68,000.
“Chek MRP tu kelai perintah beratka penanggul gerempung ti begunaka bantu pengudah ngenataika peminta ngagai aku ti nyadi pengari rayat. Aku deka berundingka pekara nya nitihka guna gerempung ti ngelanggur aktiviti ke pemaik komuniti enggau mantu perintah nyapai sistem meri servis,” ku iya dalam siti penerang.
Harden ke mega Menteri Muda Pengelantang Komuniti, madah, agih MRP ke diberi Perintah Nengeri Sarawak ke tuju dikena mantu gerempung melanja aktiviti ke deka diatur.
Tebal agi penerima chek MRP tu meri gaga ati sereta beterima kasih ngagai perintah laban seruran beratka penanggul ke ditapi rayat.
Rayat di sitak DUN Simanggang madahka diri benasit manah laban nyau deka semua genturung udah datai jalai, bisi bekal ai enggau api ti udah ngangkatka tikas pengidup sida.
