KUCHING: Opis Menteri Pelajar (KPM) komited nentuka sekula dibuka enggau nitihka garis lalau Standard Atur Pengawa (SOP) ti udah ditetapka.
Menteri Kanan (Pelajar) Datuk Dr Radzi Jidin bisi datai kediri matau sekeda sekula di nengeri Sarawak kena Hari Enam tu tadi.
Ba program keterubah, iya nemuai ke Sekula Primari (SK) Raso ti bisi 83 iku nembiak besekula ba endur nya.
“Taja bisi sekeda blok begunan di sekula tu dikategori enda selamat, nyengkaum buding nembiak, tang ungkup ke diatu nembiak nya udah diengkah ba kuarters pengajar ti digaga nyadi buding nembiak,” ku iya dalam laman facebook iya kena Hari Enam.
Ba awak ke sama, iya mega bisi ngabas SMK Senibung ti maya nya benung bejalaika pengawa beripai meresi kandang buding nembiak.
Radzi nerang, bala nembiak tebal agi dipeda gagit ati deka besekula pengudah lama enda betunga mua dalam sesi ngajar enggau belajar (PDP) enggau pengajar sida.
Ku iya madah, ari perati gaya infrastrakcha enggau pengawa muka sekula enggau di nengeri Sarawak nitihka garis lalau standard atur pengawa (SOP) fasa 3 pelin mulaika pemanah menua (PPN).
Kelimpah ari nya, entara sekula ke bukai bisi dilawa iya nya SK Biawak, SMK Sematan enggau SK Telok Melano.
Dijangka, Radzi datai matau sekula di kandang menua Sri Aman berengkah sehari tu betemu enggau bala pengajar di Sri Aman.
Berebak enggau nya, opis menteri iya deka naka ulih ngangkatka tikas rampa sekula ke manah ungkup pengelantang nembiak belajar ba gaya ti selamat.
