KUCHING: Pengelandik dalam ngaga asil produk krafjari ulih nyadi pun penatai pemisi sesiku orang, pia ku Menteri Komunikasyen enggau Multimedia, Tan Sri Datuk Seri Panglima Annuar Musa.
Produk asil pengelandik jari ke bisi di nengeri tu ngembuan pontensi ke besai nyema dilakuka enggau chara ke betul nyentuk ke ulih rembus ngagai dagang antarabansa.
“Tang enti udah nemu ila, engka kitai udah nemu ngaga kek Sarawak kek lapis, perencah laksa Sarawak, bahulu enggau mayuh macham agi.Pemandai nya mesti ditukar nyadi aktiviti ekonomi. Hobi ulih nyungkak penatai pemisi,” ku iya lebuh bejaku maya nemuai ke Tanoti House ke diatur Ejensi Pemansang Ekonomi Seni Budaya (CENDANA) ditu pagi tadi.
Berebak enggau nya, iya ngarap CENDANA ulih mantu enggau ngajar pengeluar produk asil pengelandik jari dibantu nengah geran ti disediaka perintah.
Pengeluar produk asil krafjari mega diperansang ngaul diri ba bidang digital ngambika ulih bedagangka produk ba dalam enggau luar menua seriris enggau juluk deka nyadi sebuah menua digital.
Ba awak ke sama, iya muji inisiatif ke udah dipejalaika CENDANA ti udah ngangkatka enggau ngaul pengeluar produk krafjari ke jauh lebih agi di menua pesisir Sarawak.
