KUCHING: Masung ukai pekara ti tau bai betundi begagai, pia ku Altit Penerejun Menua Dato Pandelela Rinong.
Iya madahka diri kala napi kes bansa nya enggau siku jurulatih pengudah ngerara ulah ti udu bejaku kamah.
Tetiap kali jurulatih nya betundi ngena jaku kamah, iya semina diau diri sereta ketawa laban bai ati ke irau enggau takut.
“Kala sekali suba, aku udah enda tan lalu ngerara iya tang ditundi baru. Tujuh taun pengudah nya, iya (jurulatih) ngaga ulah (didawa) kes masung,” ku iya dalam laman Twitter iya sehari tu.
Lebuh ke ngenang pasal nya, Pandelela madahka ninting taun iya (jurulatih) ngaga ulah bansa nya pengelama tujuh taun.
Ku iya madah, tu laban jurulatih nya bisi orang kuat ti nyukung sida ngujungka alit enda berani bemunyi.
Nya kebuah, Pandelela madah, jaku ajar ke patut diambi ari cherita tu iya nya endang patut bisi ketuai ti ulih ngemetulka pekara ke salah enggau ukai nutup mata meda ulah ti enda menuku.
Ku iya nerang, sida ti napi kes baka tu patut berani madah, taja mimit tetap beguna sema semua beserakup.
