SIMANGGANG, 21 Oktober: Perintah Sarawak nengah Sri Aman Development Agency (SADA) deka ngemansangka pelilih Lubok Antu nyadi palan dagang temuai ba garis entara menua.
Kaban Parlimen Batang Lupar, Dato Sri Rohani Abdul Karim madahka, Lubok Antu ngembuan potensi besai nyadi siti pintu penama entarabansa ke menua Indonesia.
“Enti sema Indu Mengeri Besai Indonesia dipindah ke Kalimantan Tengah, SADA pechaya pengawa tu deka meri empas ke besai ari sukut pemansang ekonomi.
“Pemansang nya ukai semina di Bagi Menua Sri Aman aja tang mungkur semua kandang endur di serata Sarawak,” ku iya madah lebuh bejaku ba Pengerami Ngelancharka Sri Aman Development Agency (SADA) maya Hari Empat.
Kelimpah ari nya, Rohani madahka endur bukai baka Lingga, Pantu, Lachau enggau Simanggang mega ngembuan potensi besai dikemansangka nyadi hub pengeluar pemakai.
“Beduduk ari nya, SADA nengah pelin pemansang betanam betupi udah merambu mayuh macham projek betanam betupi komersial ti mandangka empas ke manah ba endur nya,” ku iya madah agi.
SADA udah ngemendarka 48 perambu projek pemansang ba baruh ungkup bayar alternatif tauka Alternative Fundings ti nguna ungkus penyampau RM1.18 bilion.
“Semua projek tu dijangka berengkah digaga ba taun 2022,” ku Rohani madah.
