SIBU, 17 Oktober: Dalam timpuh dua minggu ke udah kes COVID-19 ba kategori 3 nyentuk ke 5 di Bagi Menua Sibu ngayanka penambah kes.
Koordinator Komiti Mutarka Penusah Ngenyit (JPBB) Bagi Menua Sibu, Dr Annuar Rapaee madahka, bisi penambah 0.79 peratus dirikodka dalam timpuh dua minggu ke udah iya nya ari 3 nyentuk ke 9 Oktober 2021 enggau ari 10 nyentuk ke 16 Oktober 2021.
Iya madahka pekara nya nengah laman Facebook iya empu maya Hari Enam.
Dr Annuar nerangka, ari 3 nyentuk ke 9 Oktober peratus ungkup kes kategori 3 ke 5 iya nya 4.14 peratus, tang niki ke 4.93 peratus ba minggu udah nya.
“Aku ngelalau mensia mayuh ke benung bejalaika kuarantin enti sema bisi kelai sakit terus nganjung diri berubat ke sepital dikena nyeliahka diri ari sakit raya.
“Pia mega, pekara ke chukup dikemeratka iya nya terus ngasika Standard Atur Pengawa (SOP), laban kitai nemu penyakit tu ulih ngasuh sesiku orang nya balat sakit,” ku iya madah.
Berebak ari nya, Dr Annuar ke mega Kaban Kunsil Nengeri (ADUN) Nangka nangkan mensia mayuh di Sibu ngambi terus besaup ngelaban sereta nagang pengekai igi penyakit COVID-19 dikena ngurangka kes kategori 3 ke 5 enggau kes pemati.
Kelimpah ari nya, iya pechaya program meri tuchuk vaksin penyungkak ti udah berengkah dipejalaika ba dalam minggu tu ulih mantu ngurangka kes COVID-19 baka ke udah dipejalaika ba sekeda menua luar ke bukai.
“Entara raban ke ditaga nerima dos penyungkak tu iya nya orang ke lunggar umur 60 taun ke atas ke bisi komorbid enggau raban gawa di luan.
“Sida deka dipedahka nengah aplikasyen MySejahtera lalu ungkup sida ke nadai aplikasyen tu sida deka nerima kangau telefon ari pegawai perubat,” ku iya madah agi.
