BINTANGOR, 17 Oktober: Projek Stadium Basketball Bintangor ti digaga nguna duit turu ari Projek Transformasyen Menua Pesisir (RTP) Kaban Kunsil Nengeri (ADUN) Meradong, Datuk Ding Kuong Hiing bejalai lanchar.
Datuk Ding Kuong Hiing, madahka projek nya digaga berenggat iya nya renggat satu enggau dua ti sama nguna ungkus sepenyampau RM1 juta.
“Penyampau anggar ungkus dikena ngaga stadium tu iya nya RM3 juta.
“Serakup Basketball Bintangor mega bisi nerima derma ari mensia mayuh dikena nyaup ngaga stadium nya,” ku iya madah lebuh ditelefon pengarang berita TVS maya Hari Enam.
Nangkan ke nya, Serakup Basketball Bintangor beterima kasih ngagai perintah Sarawak laban udah meri duit turu ngaga stadium nya ti deka nyadi palan ngatur aktiviti main basketball ke ulih ngelatih sereta ngiga nembiak rebak baru ari Bintangor ti bisi pengerindu enggau pengelandik ba dalam basketball.
Kelimpah ari nya, ba hari ke sama Ding udah nyerahka duit turu RTP ngagai dua buah rumah di Bintangor.
“Dua buah rumah panjai ke nerima RTP iya nya Rumah Sampar, Ulu Stras Bintangor enggau Rumah Lidik, Sg Mador Bintangor ke sama nerima RM50,000,” ku iya madah.
Duit turu ke diberi nya dikena ngangkatmanah infrastrakcha ba kedua-dua rumah panjai nya ti nyengkaum ngaga jalan semin.
“Projek RTP deka dipejalaika enggau chara berenggat bepelasarka duit turu ke udah dikemendarka Perintah Nengeri ninting taun sereta kunteriktor udah dichiri nengah ejensi ti bejalaika pengawa enggau chara chabut undi,” ku Ding madah agi.
