KUCHING, 16 Oktober: Pengawa Bepilih Nengeri (PRN) ke-12 Sarawak semina ulih diatur sepengudah nerima pemedar ari Yang Di-pertuan Agong Al-Sultan Abdullah Ri’ayatuddin Al-Mustafa Billah Shah.
Taja pia, pemutus Agong nya mesti nerima sanding penemu ari Tuai Pemegai Menua (TYT) enggau Kepala Menteri Sarawak, ku Menteri ba Opis Menteri Besai (Parlimen enggau Undang-Undang) Datuk Seri Wan Junaidi Tuanku Jaafar madah.
“Taja pan pia, pekara tu semina ulih ditentuka Yang di-Pertuan Agong sepengudah iya baum enggau TYT Sarawak lalu TYT Sarawak sebedau baum enggau Yang di-Pertuan Agong mesti deka baum enggau Kepala Menteri dulu senentang pekara nya.
“Udah nya, baru Gabenor enggau Yang di-Pertuan Agong baum senentang nya. Enti sema udah baum, baru ulih diatur.
Tu iya nya bidang kuasa Yang di-Pertuan Agong enggau bidang kuasa TYT sereta Kepala Menteri,” ku iya madah ba aum media sepengudah bejadika Program Nasih Tanah Masjid Mutiara Iman di Taman Sepakat Jaya 2, Demak Laut sehari tu.
Iya madahka, bisi dua pekara ti dikemeratka dulu sebedau PRN Sarawak ke-12 ulih diatur.
Siti ari pekara nya, ngemandakka timpuh Proklamasyen Darurat Sarawak 2021 ti ditukuka Yang Di-pertuan Agong enggau diteritka nyentuk ke 2 Februari 2022, ke mesti nerima pemendar ari Agong enti sema pekara nya dipinta.
Kena 31 Julai ke udah, Al-Sultan Abdullah ngenukuka Proklamasyen Darurat Sarawak dipejalaika ba pun ari 2 Ogos 2021 nyentuk ke 2 Februari taun baru.
Sepemanjai proklamasyen nya, PRN ke-12 digantung sereta enda diatur ketegal pengekai COVID-19 ke benung balat nuntung menua.
