Sri Aman: Perintah nengeri Sarawak nengah Unit Pekara Pengarap Bukai (UNIFOR) endang ngambi berat sukut pengelantang semua pengarap ke bisi di nengeri tu.
Menteri Muda Pengelantang Komuniti, Francis Harden Hollis madah, tu nyata dipeda nengah pemeri duit turu UNIFOR ngagai pengarap kristian kelai perintah nyaga pengarap semua bansa.
“Kitai meri terima kasih ngagai perintah Sarawak nengah UNIFOR enggau Datuk Amar Uggah Embas ti mega Chairman UNIFOR laban udah ngemendarka agih belanja nya ngagai rumah sembiang ba sitak DUN Simanggang,” ku iya dalam siti penerang.
Harden ke mega Kaban Kunsil Nengeri (ADUN) Simanggang madah, Gerija St Luke, Sri Aman ti diarika Vicar Fr Jackson Jarau Unggin nerima chek sepenyampau RM100,000 ari UNIFOR.
Agih nya deka diguna kena ngemanahka jalai pendam Anglika, Stutong, Sri Aman.
Kelimpah ari nya, sepenyampau RM50,000 diungkupka ngagai St Margareth Chapel, Bayai dikena ngaga pagar chapel ti diarika Fr jaol Galang.
Pengawa nyerahka chek UNIFOR nya dipenyadika Harden empu ti diatur ba opis gereja nya.
“Guna manah agih belanja nya lalu enti projek udah dipejalaika nyadi pekara nya udah tanggungpengawa raban gerija enggau chapel madahka ngagai raban ke bekaul sentang status projek nyentuk ke tembu,” ku iya.
Berebak enggau nya iya ngelalau pupu bansa ti nerima bantu tu bebasaka ke pangan diri sereta idup begulai enggau lantang.
