KUCHING, 16 Okt : Raban polis ngerap sebuah palan operasyen bitcoin di Muara Tabuan, Kuching ti dipelabaka beoperasyen nadai pemendar kena hari Lima tu tadi.
Ku Tuai Polis Pelilih Kuching ACP Ahsmon Bajah madah, sindiket nya dipelabaka beoperasyen kenyau ari bulan Dua taun tu tadi lalu nyadika rumah kedai palan bejalaika aktiviti nya.
Palan ‘Bitcoin’ nya ditemu sepengudah Sarawak Energy Berhad (SEB) tetemuka bisi kes enchuri karan ba alai palan nya beoperasyen.
“Berindik arinya, pengawa ngerap udah dipejalaika urung pukul 10 pagi (kemari) enggau asil pansik tumu tetemuka premis nya udah beoperasyen sepengelama lapan bulan enggau penyampau untung iya nya RM 23,000 sebulan,” ku iya nambah agi.
Ku iya nambah, seraban tim ti udah bejalaika pengawa ngerap nya mega udah ngetan dua iku saspek peranak kandang menua ke beumur 24 enggau 44 taun ti dipelabaka nyaga premis nya.
Polis mega udah tetemuka pengempu premis agi bedau ditan naka ke diatu.
Kelimpah ari nya, barang ke dirampas maya pengawa ngerap nya iya nya komputer, 90 unit mesin bitcoin, router enggau modem.
Kes nya ditasat ba baruh Seksyen 379 Kanun Keseksaan enggau Seksyen 33(5) Ordinan Elekterik Sarawak.
Ungkup penyalah ba baruh seksyen nya iya nya mayar denda enggau dijil enti ditemu salah.
