SEBUYAU: Kaban Kunsil Nengeri (ADUN) Sebuyau, Datuk Julaihi Narawi udah bejadika pengawa nyerahka taba Projek Chalet Sebuyau kena Hari Lima.
Projek tu deka ulih ngangkatka sektor dagang temuai kandang menua nya enggau disadang tembu kena 15 Julai 2022.
Julaihi ke mega Menteri Muda Infrastrakcha enggau Pemansang Palan Penyangkai Kapal Sarawak nya madah, projek ke beungkus sepenyampau RM4 ,908,447 nya diserahka ngagai Opis Kaunsil Pelilih Menua Simunjan ngagai kunteriktor Urbanpro Development Sdn. Bhd ti ditimpuhka digaga pengelama semilan bulan.
“Entara komponen besai chalet tu iya nya ngembuan empat unit chalet begempar, tujuh unit chalet setengah begembar, tiga unit kluster enggau dua chalet buding ti ulih nampung penyampau 84 iku orang dalam siti timpuh.
“Projek tu iya nya sebagi ari pemansang mengeri baru Sebuyau nengah inisiatif Projek Rayat Perintah Sarawak sepenyampau RM10 juta,” ku iya madah dalam laman facebook iya kena Hari Lima tu tadi.
Chalet Sebuyau ti bepalan ba tebing sungai Sebuyau iya nya siti komponen mengeri baru Sebuyau ke alai projek tu udah bulih pemendar ari Kepala Menteri, Datuk Patinggi Abang Johari Tun Openg.
Sama bisi datai ba pengawa nyerahka taba projek tu iya nya Pegawai Opis Pelilih Simunjan, Abdul Khalid Manap, Sekretari Opis Pelilih Simunjan, Mohd Rizal Zakaria, Menijar Juliah Sabri enggau Pegawai Tadbir Sarawak Ajis Ahmad.
