SELANGAU, 16 Oktober: Tuai Peranak enggau Tuai Raban Bansa di Tatau lebih agi di sitak Kunsil Nengeri (DUN) Kakus diperansang ngambika terus ngelalau rayat ke diau ba genturung pendiau tauka rumah panjai seruran bejejaga sereta ngasika Standard Atur Pengawa (SOP) ke agi diteritka perintah.
Kaban Kunsil Nengeri (ADUN) Kakus Datuk John Sikie Tayai nyemetak madahka, diatu menua benung deka ngalih ke renggat endemik lalu rayat neruska pengidup ninting hari begulai enggau virus COVID-19.
“Aku minta bala tuai rumah enggau tuai genturung pendiau nesau bala sida terus ngasika SOP taja pan pemindah mensia mayuh diatu enda ditagang baka sebedau tu.
“Enti kitai meda kes ninting hari mayuh kes dirikodka ba rumah panjai. Ukai semina kitai ke diau ba Tatau aja tang mega pelilih bukai ti dibanding kes ke dirikodka ba mengeri,” ku iya madah lebuh ba nyerahka Chek MRP ngagai 14 JKKK Rumah Panjai enggau lapan PIBG maya Hari Lima.
John Sikie ke mega Menteri Muda Undang-Undang enggau Adat Bumiputera nerangka senentang pengidup rayat ba rumah panjai suah agi bejaku semak enggau pangan diri, bisi sekeda enda tauka kurang ngemeratka SOP baka enda nguna sengkabung mua laban udah teleba idup begulai sebedau tu.
“Bisi mega sida ke ngatur pengerami hari pengada tauka pengerami bukai taja pan SOP enda ngemendarka aktiviti nya diatur.
“Diatu kitai benung ngalih ke renggat endemik lalu kitai mesti semampai nyaga pengelikun diri,” ku iya madah agi.
Ba pengerembai ke sama, iya minta penerima MRP nguna ungkup nya manah-manah bejalaika projek pemansang tauka program ti meri pemaik ngagai peranak rumah panjai.
“Anang nyimpan chek MRP nya kelalu lama enggaika nyau datai ba hari bulan ti kepenudi. Anjung terus ke bank ngambika duit nya ulih dikeluarka terus,” ku John Sikie madah.
Kelimpah ari nya, bantu ke diberi ngagai pengatur sekula tauka Gerempung Apai Indai enggau Pengajar (PIBG) dikena nyendiaka perengka baka ‘hand sanitizer’, sengkabung mua enggau perengkaguna bukai sebedau nembiak besekula baru.
“Bantu ke diberi nya ukai dikena bejalaika program tauka aktiviti nembiak di sekula,” tambah iya.
Pastor Maxwell Along, ti ngarika Gerija BEM Pasar Tatau beterima kasih ngagai perintah Sarawak laban udah ngungkupka duit turu sepenyampau RM150,000.00 ti deka diguna sida ngangkat manah tikas gerija nya.
