KUCHING: Atur ngemendarka penama enggau pemulai rayat Sarawak ke nengeri tu benung diperundingka baru ba baruh kimpin ‘Jom Ke Sarawak’ ti dilancharka sehari tu.
Menteri Dagang Temuai, Seni Enggau Main Asal Sarawak, Datuk Seri Abdul Karim Rahman Hamzah madah, tu laban bisi sekeda napi penanggul deka pulai ke Sarawak taja diatu udah enda begunaka permit ari polis.
Taja pia, Karim pechaya Komiti Mutarka Penusah Ngenyit Nengeri (JPBN) Sarawak deka berundingka pekara nya enggau naka pengelengkas dikena nangkup peminta rayat ti udah lama enda ulih pulai ke sarawak berindik ari pandemik COVID-19.
“Dipelabaka kitai deka muka awak ngagai orang Sarawak dulu, ti nadai betagang nyengkaum permit tama ke Sarawak. Permit tama ke Sarawak. Kitai deka beratika pekara tu, naka pengelangkas. Ngagai sida ti ukai diau di Sarawak tauka ukai asal Sarawak dipinta besabar dulu,”ku iya ba aum media pengudah ngelancharka kimpin ‘Jom Ke Sarawak’ sehari tu tadi.
Ku iya, iya nemu mayuh sekeda nyau semak dua taun enda pulai nyentuk bisi ke sebana ba sebelah laman media rama ketegal penanggul nya.
