SRI AMAN: Sepenyampau RM545 juta diungkupka dikena bejalaika 14 projek bekal ai ba bagi menua Sri Aman.
Menteri Muda Utiliti (Bekal Ai) Datuk Dr. Abdul Rahman Junaidi madah, tu ngayanka perintah Sarawak ngemeratka pengelantang rayat nengah Opis Menteri Utiliti Sarawak enggau Opis Bekal Ai Menua Pesisir (JBALB) Sarawak nyadi ejensi pengatur projek sereta Opis Menteri Pemansang Menua Pesisir (KPLB) dalam ngemanahka sistem bekal ai di pelilih Sri Aman.
Ku iya madah, bisi semilan projek rayat enggau lima projek KPLB dipejalai dikena nangkup peminta guna ba bekal ai ti majak nambah ba kandang menua nya.
“Naka ke diatu, bisi lima projek ke beungkus RM32 juta udah tembu digaga enggau udah mujur mutarka isu bekal ai ba sekeda kandang menua di Sri Aman,” ku iya.
Ku iya nambah, semua lima projek nya diatu ba renggat digaga ke beungkus sepenyampau RM191 juta ti ngayanka pemansang ke positif sereta nitihka timpuh ti udah ditetapka.
Projek tu sebagi ari sistem grid bekal ai Sarawak ti diperambu Kepala Menteri Sarawak Datuk Patinggi Abang Johari Tun Openg dikena mutarka penanggul bekal ai ba kandang menua nya.
