SRI AMAN: Pengawa ngemanahka Loji Rawatan Air Bayai ari kapasiti 33.3 MLD ngagai 53.3 MLD ti beungkus sepenyampau RM21.5 juta disadang tembu November 2021.
Penembu nya ila ulih tetangkupka peminta guna bekal ai beresi kelimpah meri pemaik ngagai peranak ba mengeri Sri Aman, Stumbin, Seduku, Lingga Nyentuk Ke kandang menua Batu Lintang.
Kaban Kunsil Nengeri (Adun) Lingga, Simoi Peri madah, projek bekal ai tu dipelanja penuh perintah Sarawak dikena mutarka isu bekal ai di pelilih menua tu.
Ku iya madah, bisi dua projek bekal ai udah tembu digaga iya nya Projek Bekal Ai di Stumbin Bijat sereta Projek Paip Ai enggau High Level Tank Di Seduku Agropolitan.
“Projek Bekal Ai di Stumbin Bijat udah tembu bulan Disember 2019 enggau ungkus sepenyampau RM1.4 juta,” ku iya dalam laman facebook iya pengudah ngelawa projek bekal ai bagi menua Sri Aman ba Opis Bekal Ai Menua Pesisir (JBALB) di Sri Aman, kena Hari Empat.
Kelimpah ari nya, projek paip ai enggau High Level Tank di Seduku Agropolitan mega udah tembu digaga kena 4 Mac 2021 ke beungkus sepenyampau RM11.5 juta.
Berebak enggau nya, iya meri terima kasih ngagai JBALB laban udah nembuka kedua-dua projek bekal ai nya ke pengelantang peranak di sitak Sri Aman.
Sama bisi ngulu pengawa ngelawa Loji Ai Bayai tu iya nya Menteri Muda Utiliti (Bekal Ai) Datuk Abdul Rahman Junaidi.
