KUCHING, 14 Oktober: Produk inovasyen mesti nyapai juluk ke udah ditetapka tebal agi ba pengawa mutarka penanggul ke ditapi rayat enggau sesebengah organisasyen.
Ku Sekretari Perintah Sarawak, Datuk Amar Jaul Samion madah, keterubah, pekereja perintah mesti mutarka penanggul ke ditapi rayat nguna chara ke patut sereta berundingka chara bukai ke pemadu engkeman dikena mutarka penanggul nya.
“Kedua, inovasyen mesti digaga dikena mutarka penanggul ke ditapi sesebuah organisasyen baka kurang penyikar ba dalam opis tauka ejensi ke bekaul.
“Tuju nya dikena nambahka penyikar ba dalam organisasyen awakka ulih bejalaika pengawa enggau lebih jampat, ngemeratka pengelantang rayat, nambahka asil penatai perintah, ngurangka belanja ke diguna sereta ke bukai,” ku iya madah lebuh bejaku beserimbai enggau Pengerami Nyuaka Anugerah Sarawak Civil Service Innovation Convention Awards (SCSIA) 2021 ke diatur maya Hari Empat.
Iya madahka, ulah tauka budaya inovasyen ti terus diterenak Unit Moden Servis Nengeri, Opis Kepala Menteri kenyau ari 10 taun ke udah ulih mantaika bemacham idea enggau chara baru ke ulih nukar chara lama tauka konvensional ke udah enda relevan sereta meri pengerugi.
“Tu mih peluang ke mesti diambi kitai dikena nguji daya kitai mantaika buah runding ke tau ngerandang jalai baru lebuh ngereja pengawa.
“Aku meransang semua produk inovasyen tu dipejalaika sereta dipasuk ke dalam langgur ke ulih dipejalaika ke nerima kerejasama enggau komprehensif dikena ngelala sereta mutarka penanggul ke ditapi rayat lebih agi sida ke mendam ba menua pesisir,” ku iya madah.
Nengah chara tu, rambai jaku beserimbai enggau pengerami Bulan Inovasyen Servis Perintah Sarawak iya nya, “Innovation;Breaking through Norms’ udah nyapai juluk ti ngemeratka inovasyen ke meri empas ke manah ngagai pengelantang rayat.
