KUCHING, 14 Oktober: Pekereja perintah diperansang ngambika ngemeratka buah runding kreatif, kritis enggau konstruktif lebuh bejalaika pengawa.
Sekretari Perintah Sarawak, Datuk Amar Jaul Samion madahka pekereja perintah mesti ngiga idea baru dikena ngubah chara kereja konvensional ngagai chara baru ke lebih inovatif seriran enggau gaya tauka norma baru.
“Kenyau ari sepuluh taun ke udah sekeda ejensi udah ngeluarka bemacham produk ke inovatif.
“Inovasyen ke ditempa mesti dikemeratka awakka meri empas ke seririh enggau peminta guna kemaya hari,” ku iya madah lebuh bejaku beserimbai enggau Pengerami Nyuaka Anugerah Sarawak Civil Service Innovation Convention Awards (SCSIA) 2021 ke diatur maya Hari Empat.
Iya nyemetak madahka, produk inovasyen ukai semina deka nangkup penetap pekit enggau bulih perais aja lalu rambai jaku ukai semina didinga pia aja.
“Produk inovasyen ti mandangka empas ke manah mesti ngelui ari skop servis ke lebih besai sereta mungkur semua serak peranak sekalika ke diau ba mengeri tauka menua pesisir.
“Nadai siku tinggal ari nerima penguntung asil ari langkar kereja inovasyen ke benung dipejalaika kitai naka ke diatu enggau dudi hari,” ku iya madah agi. – TVS
