KUCHING , 14 Okt : Perintah Sarawak udah ngungkupka penyampau RM60 juta bagi bejalaika program bantu sum ungkup pekebun mit kelapa sawit enggau lada di serata nengeri.
Sapit Kepala Menteri Datuk Amar Douglas Uggah Embas madahka program nya dijangka deka meri pemaik ngagai kira-kira 58 ribu iku pekebun.
Ku Menijar Besai Salcra Joseph Blandoi, pekara tu chukup manah ungkup pekebun sawit kelebih agi lebuh dunya benung napi pandemik COVID-19.
Menteri Betanam Betupi Chara Moden, Tanah Adat enggau Pemansang Kandang Menua madahka tetiap iku pesereta deka nerima bantu penyampau 12 beg sum.
Ku Joseph Blandoi, berita ke udah dipadahka Kepala Menteri Sarawak, Datuk Patinggi Abang Johari Tun Openg senentang ungkup khas ke diberi ngagai pekebun mit kelapa sawit nya chukup manah lalu ku iya, sida tu patut berasai gaga enggau berita tu laban bisi bantu ari perintah ungkup sida pekebun.
Ketebal agi diatu ku iya kitai benung napi pandemik COVID-19 tajapan rega buah sawit benung manah diatu tang sida ke bisi kebun sawit napi pemar deka ngulihka sum.
Tu berindik ari logistik tauka kapal pengangkut barang napi penanggul mindah ari menua siti ngagai menua siti.
“ Diatu mega rega baja pen udah niki dalam 30 ngagai 40 peratus. Ambika chunto, rega uria tauka sum garam ku kitai, ke chura burak. Suba dalam RM2200 setan tang diatu udah niki ngagai RM3100 setan”, ku iya.
Nangkan ke nya Joseph ngarapka bantu tu ulih mantu ngurangka ungkus belanja bagi maja buah sawit sida.
“ Aku mega ngarapka bantu ke baka tu ulih ngurangka ungkus sida iya maja,ngadu kebun lalu ulih nambahka penguntung sereta nambahka tikas pengidup sida ke bisi kebun sawit , “ ku iya lebuh dikerandau pemberita TVS.
Enggau nya iya mega ngarapka sida ke bisi kebun bukai mega bulih bantu ke baka tu sereta seruran nyukung pengawa ke diatur perintah menua kitai.
Inisiatif perintah tu deka dipejalaika sechara bererenggat berengkah Bulan Sepuluh tu.
