KUCHING, 13 Oktober: Sarawak ngerikodka 1,165 kes baru COVID-19 naka hari tiga ti nyadika penyampau kumulatif semua kes ba nengeri tu manggai 227, 675.
Komiti Mutarka Penusah Ngenyit Negeri (JPBN) Sarawak ba dalam siti penerang madahka, Kuching terus ngerikodka kes pemadu tinggi iya nya 257 kes, ditangkan ke Miri (211), enggau Sibu (128).
“Semua kes baru nitihka kategori klinikal iya nya kategori 1 (343), kategori 2 (8070, kategori 3 (20, kategori 4 (9) enggau kategoti 5 (4).
“Penyampau kes ba kategori 3, 4 enggau 5 iya nya 15 kes naka hari tiga,” ku JPBN Sarawak madah.
Berebak ari nya, Sarawak ngerikodka 13 kes pemati ketegal COVID-19 ba pun ari 4 Oktober nyentuk ke 12 Oktober 2021 ti ngaul pesakit ke bisi rikod sakit raya baka kemi manis, tinggi darah, buah pinggang (tungkul sengayuh), jantung (tungkul ati), obesiti enggau strok.
Nangkan ke nya, JPBN Sarawak madahka bisi tiga kluster baru ditukuka ti ngaul Kluster Menuang, Limbang, Kluster Ensurai Limbang enggau Kluster DTI Bekenu, Subis.
“Ketiga-tiga kluster baru nya ngaul Kluster Komuniti enggau Kluster Depo Tahanan,” ku iya madah.
Pia mega, bisi dua kluster udah punas iya nya Kluster Sebayang-Stalun, Limbang enggau Kluster Pasar Matu, Matu sepengudah kedua-dua kluster nya nadai ngerikodka penambah kes baru COVID-19 dalam timpuh 28 hari.
“Penyampau semua kluster ke agi aktif tauka bedau punas di Sarawak iya nya 66 kluster,” tambah JPBN Sarawak.
Bisi empat genturung pendiau bejalaika Atur Nagang Pemindah Diteritka (PKPD) ke ngaul Rh. Suting, Punggu Dadak Sri Aman (13 – 22 Oktober 2021), Rh. Francis, Lidong, Skrang Lubok Antu (13 – 22 Oktober 2021), Rh. Bansa, Sg Selangan Sarikei (13 – 22 Oktober 2021), Rh. Intai, Menuang Limbang (14 – 23 Oktober 2021).
Timpuh PKPD dilanjarka ba Rh. Ruekeith Jampong, Langkang Ili, Engkilili Lubok Antu iya nya ari 13 – 16 Oktober 2021.
Kelimpah ari nya, empat genturung pendiau udah abis bejalaika PKPD ti ngaul Rh. Baba Owin, Pasa Baroh Betong (13 Oktober 2021), Rh. Roy, Tembawai Lubok Betong (13 Oktober 2021), Rh. Mubok, Tanjung Paoh Betong (13 Oktober 2021), Ladang Senandung Masyhur Sdn.Bhd Jalan Matu – Igan Matu (14 Oktober 2021).
