KUCHING, Okt 12 : Bisi siku lelaki ditinggang ukum dijil sepengelama tiga bulan ari Kort Majistret, Kuching kena sehari tu ketegal enchuri sereta  tama nadai pemendar ba sebuah pantri di Klinik Tibi kena bulan lapan apin lama ti udah.
Lelaki nya ngaku penyalah iya sepengudah penyalah iya dibaca betunga mua enggau luyar Majistret Syarifah Fatimah Azura Wan Ali.
Ke rikod, iya ngaduka pengawa nya ba sebuah pantri Klinik Tibi, Jalai Masjid urung pukul 4.30 kena 13 hari bulan Lapan ti udah.
Lelaki nya didawa ba baruh Seksyen 448 Kanun Keseksaan iya nya dijil sepengelama tiga taun tauka mayar denda enda ngelui ari RM5,000 tauka kedua-dua nya sekali enti ditemu salah.
Bepelasarka kes nya sekuriti benung bejalaika pengawa matau iya urung pukul 4.30 pagi lalu tetemuka pagar besi ba begian belakang klinik nya udah dipotong.
Lalu iya tetemuka siku lelaki ti enda dikelala benung begigaka barang ba pantri ba klinik nya.
Lelaki nya deka ngelarika diri tang dua iku kaban sekuriti nya nangkap iya lalu mai iya ke balai polis bagi bejalaika atur ti patut.
Asil tasat polis, lelaki nya udah ngaga penyalah ba baruh Seksyen 448 Kanun Keseksaan laban tama ba endur klinik enggau nadai pemendar.
Pegawai Pendawa Inspektor Mohd Adzmei Ahmad minta kort ngatur bechara lalu ngukum orang ti dituduh nitihka Seksyen ti udah ditetapka.
