KAPIT, Okt 12 : Siku lelaki bebadi nyawa sepengudah kerita ke dibai iya tebelungging ba penusah jalai alun di Jalai Bleteh, Kapit urung pukul 4.20 lemai kena hari 11 Oktober 2021.
Tudah ti dikelala Ting Hing Lee, 40 taun, disahka bebadi nyawa sepengudah nerima perubat di Unit Intu Siru (ICU) di Sepital Kapit.
Ku Tuai Bomba enggau Penyah Penusah (BBP) Kapit Erwandy Tugor madah, penusah jalai alun nya bekaul enggau empat buah kerita ti nyengkaum sebuah utiliti sukan SUV ke dibai tudah.
Raban bomba nerima kangau ngenyit bekaul enggau eksiden nya urung pukul 4.30 lemai.
Seraban bomba digerah ke palan penusah dikena bejalaika operasyen nyelamat.
“Sepengudah datai ba endur penusah nya nyadi, dia’ raban bomba tetemuka sebuah kerita Lexus tebelungging ba tengan jalai alun enggau deriba iya udah dipansutka mensia mayuh lalu nerima perubat ari raban paramedik,”
Tudah bakal ba begian pah kiba lalu ngembuan balat bakal.
Taja pia orang ke deriba kerita nya enggau tiga buah kerita ke bukai diripotka nadai ngembuan sebarang bakal.
Sepengudah nerima perubat ba endur nya, tudah lalu dibai ngagai sepital ngena kerita EMRS bagi bejalaika atur ti patut.
Operasyen nya diketuka urung pukul 5.23 lemai.
