SIBU, Okt 12 : Bisi siku orang berikan tekenyit tetemuka tubuh lelaki melepu ba Sungai Batang Igan kena 11 Oktober 2021.
Tubuh ti enda dikelala nya ditemu ba baruh perau maya iya nurun berikan.
Ku Tuai Polis Pelilih Sibu Assistant Komisioner Stanley Jonathan Ringgit madah, sida nerima kangau ngenyit urung pukul 3 lemai.
“Bisi sebuah unit Kerita Peronda (MPV) Sibu nerima kangau ngenyit lalu terus ngagai palan alai penusah nya nyadi ba sebuah wap di belakang Kem Sri Rejang (Rejimen 510 Askar Wataniah),”
“Polis lalu betemu enggau orang berikan nya sebedau iya ngayanka tubuh tudah ti ba baruh perau iya,” ku iya madah agi.
Sapit Tuai Polis Pelilih Sibu Superintenden Collin Babat mega bisi ba palan alai penusah nya nyadi.
Asil peresa tetemuka bisi kelai pantang Nazi ba pah kiba tubuh tudah.
Tubuh iya lalu dibai ngagai Sepital Sibu bagi bejalaika atur ti patut lalu polis ngelalau mensia mayuh enti sema bisi informasyen bekaul enggau kes nya tauka orang ke lenyau entara sida sebilik ulih betelefon ngagai balai polis ke besemak.
