KUCHING, 11 Oktober: Raban polis mujur ngemuntanka dua aktiviti bekaul enggau dadah di pelilih Kuching kena 9 enggau 10 Oktober 2021.
Pengawa ngerap dua aktiviti dadah tu dipejalai raban ari Seksyen Tasat Penyalah Jai Narkotik IPD Kuching.
Ba operasyen ti keterubah, raban polis mujur nangkap siku lelaki sepengudah tetemuka semilan paket plastik burak ngembuan leka kristal ti dipechaya dadah bansa syabu.
Ku Tuai Polis Pelilih Kuching , ACP Ahsmon Bajah madahka lelaki nya ditangkap raban polis sepengudah ngerap endur jalai ba belakang begunan Chong Lin Plaza, Jalai Green di Kuching maya Hari Minggu.
“Dadah ke ditemu nya pemerat 71.96 gram sereta dipelabaka beungkus RM7196.00 ringgit. Bisi mega dirampas iya nya kerita 4WD Ford.
“Asil peresa ai kemi ngagai saspek ditemu negatif lalu saspek mega nadai ngembuan rikod penyalah lama”, ku Ahsmon madah dalam siti penerang sehari tu.
Kelimpah ari nya, ba peresa ti kedua iya nya 10 Oktober ba tisi jalai Cahaya Mata 4, Bandar Baru Semariang Kuching tetemuka siku lelaki ngembuan 4 paket plastik burak ti dipechaya dadah bansa syabu.
“Raban polis meresa tubuh lelaki ke beumur 33 taun nya lalu tetemuka dadah bansa syabu ba tanchut saspek ti dipelabaka pemerat 5.68 gram beungkus RM568.00.
Kes ditasat ba baruh Seksyen 39 (1) ADB 1952 enggau Seksyen 15 (1) (a) ADB 1952 ketegal positif dadah lalu saspek mega bisi ngembuan tiga rikod lama ba baruh Seksyen 15 (1) (a) ADB 1952.
Saspek mega ngembuan waran tangkap lalu deka diukum ba baruh Seksyen 39C ADB 1952.
“Ungkup penyalah ba baruh Seksyen 39B ADB 1952, saspek ulih diukum gantung sampai mati enti ditemu salah sereta dijil seumur idup enggau dilunsin enda kurang ari 15 kali.
“Pia mega, saspek ulih diukum ba baruh Seksyen 39A(1) ADB 1952 enti ditemu salah deka diukum penjara enda kurang ari 2 taun, dilunsin enda kurang ari 3 kali tauka enda lebih 9 kali,” ku iya nambah agi.
Ahsmon mega madahka saspek ulih diukum jil 2 taun sereta ukum mata duit manggai RM5,000 enti ditemu salah ba baruh Sekysyen 39A(1) ADB 1952.
