SELANGAU, 10 Oktober: Projek ngangkatmanah jalai balak lama ari jalai tanah ke jalai batu enggau jematan kayu ke jematan besi di Bunau Pakoh Oya dijangka tembu digaga ba ujung taun tu.
Kaban Kunsil Nengeri (ADUN) Tamin, Christopher Gira Sambang madahka, iya enggau sekeda ari raban pemesai ke bukai bisi nurun ngabas projek nya seraya nemuai ke Rh Udin Letan.
“Rumah panjai (Rh Udin Letan) 16 pintu tu iya nya entara rumah panjai ke pemadu jauh ba Ulu Oya/Sekuau lalu sebedau tu peranak ba kandang endur nya nguna Sungai Batang Oya ke nyadi jalai pengangkut lebuh bejalaika pengawa ninting hari.
“Aku nguna duit turu ari Projek Transformasyen Menua Pesisir (RTP) dikena ngaga kedua-dua projek nya sereta dijangka ulih tembu ba ujung taun 2021,” ku iya madah lebuh ditelefon pengarang berita TVS maya Hari Minggu.
Kelimpah ari nya, Christopher madahka peranak ba Rh Udin, Rh Johnny enggau Rh Anthony deka ngasaika bekal karan 24 jam enda lama agi ti dipejalaika nguna ungkup ba baruh Projek Rayat.
“Aku beterima kasih ngagai Perintah Sarawak laban udah nyendiaka duit turu dikena bejalaika projek pemansang di kandang menua pesisir lebih agi ba sitak DUN Tamin.
“Naka ke diatu, kerja nirika tiang enggau grid karan udah tembu digaga semina nganti masang meter ba tetiap bilik,” ku iya madah.
Iya mega arapka, pemisi perengkaguna nya deka muka lebih mayuh peluang sosio-ekonomi ke tau nambahka tikas pengidup rayat ke mendam ba dia.
Entara temuai ke bisi ngulu pengawa nemuai iya nya PS Edwin Banta, Pengulu Andrewson Ngalai, Pengulu Surang, kaunselor, tuai rumah enggau rayat ba kandang menua nya.
