KUCHING: Operasi CARILAMAT diteruska ba hari ti ke 7 urung pukul 6.30 pagi hari Enam.
Semua aset dikena bejalaika operasyen nya mindah ke endur ke udah ditetapka PHC Jeti Opis Pengawa Berikan Tasik Sarawak.
Ngambi berita ari UKAS, penerang media Ejensi Penerit Atur Maritim Malaysia (Maritim) madahka, koordinasyen Operasyen CARILAMAT ti udah ditetapka Maritim Malaysia dibagi ngagai empat sektor enggau pemesai sektor endur ngiga dikemesaika ngagai 483.23 batu nautika persegi.
“Sektor endur ngiga sehari tu ba sebelah kandang endur tasik 15 batu nautika enggau ke atas ari Tanjung Sipang ti nyerangkung kandang endur tebing tasik Besi Buruk, Tanjung Sipang, Karang Berumput, Tukun Bass, Pulau Lakei sereta sebelah Pulau Satang , Pulau Sampadi sereta Batu Mandi, Lundu,” ku iya madah.
Kelimpah ari nya, raban penyelamat bejalaika pengawa ngiga ba kandang endur tebing pantai ari Tanjung Sipang ke Pulau Satang, enggau ari Tanjung Sipang ke Tanjung Po sereta Sebuyau.
“Pemesai semua kandang endur ba hari ti ketujuh iya nya 3144.04 batu nautika persegi.
“Naka ke diatu, bedau bisi kelai baru ditemu raban penyelamat ba dalam operasyen nya,” ku iya madah agi.
Maritim Malaysia mega udah nguna dua aset iya nya Kapal KM Cekal enggau Bot Maritim Kilat 35 seraya disukung 115 iku raban ari mayuh macham ejensi ke bekaul.
“Pengawa ngiga sehari tu nerima sukung aset ari Raban Polis Marin (Bot PSC 34), Opis Bomba enggau Penyelamat Malaysia (JBPM), Opis Pengawa Berikan Tasik Sarawak (Bot JPLS 20), Sarawak Coast Guard (SC Tenggiri enggau SC Barracuda) sereta Raban Pengetan Pengelikun Periman Malaysia (APM).
“Pengawa ngiga nengah langit nguna aset ari Unit Langit Bomba (Helikopter MI 171) enggau Raban Gerakan Udara, Pesawat CE 408),” ku penerang nya madah.
