PUTRAJAYA: Perintah deka mekuhka pemansang lumba menua ti ngaul orang indu, ngiga nembiak rebak baru ke bisi pengelandik ba lumba sereta deka nyadika lumba siti ari asil baru penumbuh ekonomi.
Menteri Besai Datuk Seri Ismail Sabri Yaakob lebuh ngulu pengerami Hari Sukan Negara (HSN) 2021 ba Opis Menteri Nembiak enggau Lumba (KBS) udah ngelancharka Langkar kereja Orang Indu Ba Dalam Lumba; Program Talent Identification and Development (MyTID) enggau pengawa numbuhka Langkar Kereja Industri Lumba Menua maya Hari Enam.
Ku Ismail Sabri madah, Langkar Kereja Orang Indu Ba Dalam Lumba udah netapka langgur ti ngaul objektif, strategi enggau inisiatif ke lebih tegap.
Tuju nya dikena negapka pengawa orang indu ti ngaul mayuh macham bidang lumba seraya deka nyadika pemansang lumba menua ke lebih inklusif sereta sebela.
“Langkar Kereja Orang Indu Ba Dalam Lumba dikearapka ulih nambahka penyampau orang indu ngaul diri ba dalam aktiviti lumba, nyadi tuai ba dalam gerempung lumba sereta nyadi jurulatih enggau pegawai lumba,” ku iya madah.
Ismail Sabri madahka, perintah udah ngungkupka penyampau RM10 juta dikena ngemujurka Langkar Kereja Orang Indu Ba Dalam Lumba ti ngemeranka lima pekara, lapan objektif, 19 strategi enggau 45 inisiatif.
Kelimpah ari nya, Komiti Orang Indu Ba Dalam Lumba mega udah ditumbuhka dikena merambu enggau matau pejalai langkar kereja nya.
“Bisi 15 iku pakar malin ti ngaul pengari ari opis menteri, gerempung lumba, atlit lama, enggau tebangkar ba dalam komiti nya,” ku iya madah agi.
