KUCHING, 08 Oktober : Ex pegawai Soldadu Langit Diraja Malaysia (TUDM) BUda Anchah mujur mandangka umur semina lumor aja. Pekara ti patut dikemeratka iya nya ulah ti manah tauka disiplin dalam ngereja sesebengkah pengawa.
Iya ti berasal ari menua Sri Aman tu udah mai pulai midul pirak dalam pekit gumpal isi dunya ti diatur di Tashkent, Uzbekistan enda lama ke udah.
Buda Ak Anchah enggau Dr Malvern udah mujur datai di Padang Bilun Entarabansa sehari tu urung pukul 10:45 minit pagi lalu penatai iya diambat Menteri Muda Raban Nembiak enggau Lumba, Datuk Snowdan Lawan.
Datuk Snowdan Lawan berasai temegah ati enggau pemujur atlit gumpal isi Malaysia tu laban ke udah mai pulai empat buah midul perak, iya nya siti midul dipenggi Dr Malvern ungkup kategori 60 kilogram, lalu tiga buah midul agi dipenggi Buda ungkup kategori Master ( umur 40 – 49 taun ), kategori atas 70 kilogram enggau mega kategori bechampur begulai enggau Meilaura Dora Jimmy.
Kelimpah ari nya ku iya bepekit tauka besemekih enggau atlit ari menua luar ukai pekara ke mudah ketebal agi lebuh dunya diatu agi napi pandemik COVID-19 tang taja pia ku iya Buda enggau kaban iya enda ngemuntanka pengarap rayat Malaysia, tebal agi menua Sarawak.
Nangkan ke nya ku Snowdan, iya ngarapka pekara tu ulih neladan nembiak rebak baru ngambika ulih nyambung legasi Buda Anchah.
“Tentu baka selama tetiap iti pingat ke dibulih deka meri penguntung tauka insentif ke deka diberi perintah nengeri Sarawak lalu pekara tu deka dipadahka menteri kami empu,”ku iya.
