KUCHING: Rayat Sarawak dilalau terus ngasika Standard Atur Pengawa (SOP) ke udah ditetapka Komiti Mutarka Penusah Ngenyit Nengeri (JPBN) Sarawak taja pan diatu mindah meraka pelilih udah dikemendarka.
Sapit Kepala Menteri ke mega Chairman JPBN Sarawak madahka, pemutus nya digaga perintah sepengudah trend tauka gaya kes COVID-19 di nengeri tu bisi kurang.
“Aku ngelalau mensia mayuh ke deka pulai ke menua tauka rumah panjai ba menua pesisir seruran bejejaga.
‘Kita ulih ngaga peresa nguna Kit Peresa Diri COVID-19 ke bisi dijual ba kedai enggau farmasi sebedau kita mulaika diri ke menua tauka rumah panjai,” ku iya madah lebuh bejaku ba ‘Majlis Kesyukuran Anjuran Agama-Agama Lain’ ti diatur Unifor beserimbai enggau Pengerami Hari Pengada Ke-85 Tuai Pemegai Menua Sarawak Taun 2021 maya Hari Lima.
Uggah madahka, nya entara chara dikena nyaga apai indai, aki, ini, aya, ibu enggau anak mit ari dirampit igi penyakit COVID-19.
Kelimpah ari nya, iya minta sida ke pulai ke menua tauka rumah panjai mesti semampai nguna sengkabung mua, nyaga seraka fizikal, anang bejaku kelalu semak enggau pangan diri sereta seliahka diri ari begelumu lebuh datai ba rumah panjai.
Uggah mega madahka Unifor ditumbuhka Kepala Menteri Lama niang Tan Sri Adenan Satem tauka lebih dikelala enggau nama Tok Nan ti terus mai pemansang ba Sarawak.
“Unifor diatu nyadi ejensi ti ngemeratka senentang randau, pemereti ati sereta kerejasama entara pengarap bukai ke ukai Islam di Sarawak,” ku iya madah agi.
