PUTRAJAYA, 8 Oktober : Taka tauka penyampau orang nadai kereja di Malaysia nurun 4.6 peratus ngagai 748,800 iku maya bulan Ogos enti dibanding 778,200 iku kena ke bulan Julai berindik ari mayuh aktiviti ekonomi dikemendarka dibuka baru.
Bepelasarka Statistik Utama Tenaga Buruh di Malaysia ti dikeluarka Opis Statistik Menua kena ke Ogos 2021, penyampau peranak Malaysia ke kereja nambah ngagai 0.5 peratus tetiap bulan ti manggai 15.38 juta iku orang kena ke bulan Ogos enti dibanding 15.29 juta iku maya bulan Julai.
Penyampau pekereja mega nambah ungkup bulan kedua iya nya 0.3 peratus ngagai 16.13 juta iku kena ke bulan Ogos 2021 enti dibanding 16.07 juta iku kena ke bulan Julai, lalu taka pekereja ke bisi nyereta (KPTB) naka bulan nya nambah 0.1 peratus ngagai 68.4 peratus enti dibanding 68.3 peratus maya bulan Julai.
Ku Tuai Opis Statistik Malaysia Datuk Seri Mohd Uzir Mahidin ba siti penerang madahka, penyampau pekereja dipeda bisi manah mimit ba bulan Ogos tebal agi mayuh aktiviti ekonomi dikemendarka dibuka ti belalauka Standard Atur Pengawa (SOP).
“Penyampau guna pekereja ke nambah tu mandangka penurun taka orang nadai pengawa ba bulan nya ditambah mega mayuh nengeri udah mupuk ngalih renggat ba Pelin Mulaika Pemanah Menua (PPN),” ku iya madah ba siti penerang maya Hari Lima.
Perlis enggau Sarawak udah ngalih ngagai renggat ketiga kena ke bulan Ogos tang enda nyerangkung semua pelilih di Sarawak ti agi ba renggat kedua, Negeri Sembilan enggau Wilayah Persekutuan mega ngalih ngagai renggat dua enggau empat kena ke 26 Ogos.
Nangkanka nya, Johor, Kedah, Melaka, Selangor, Wilayah Persekutuan Kuala Lumpur enggau Putrajaya agi ba renggat satu lalu enam nengeri ke bukai udah ngalih ngagai renggat kedua.
Kelimpah ari nya, Mohd Uzir madahka bisi 83.8 peratus ari penyampau orang ke nadai gawa nya nyerangkung orang ke besedia bekerja enggau benung ngiga kereja lalu penyampau raban tu bisi nurun nyentuk ke 3.7 peratus ngagai 627,500 iku enti dibanding 651,300 iku kena ke bulan Julai 2021.
Ari penyampau nya , 53.8 peratus iya nya nya orang ke nadai kereja kurang ari tiga bulan lalu sida ke nadai kereja dalam timpuh ke panjai lebih ari setaun iya nya 9.0 peratus.
Mohd Uzir madahka PPN ti ngemendarka muka baru sektor ekonomi tu ulih nyendiaka mayuh agi peluang pengawa ngagai orang ke benung ngiga pengawa di menua tu.
