KUCHING: Perintah Gabungan Parti Sarawak (GPS) endang ngelaluka raban nembiak ngaul diri ba dalam proses demokrasi laban nya deka nyadi siti pelantar dikena sida mantaika buah runding sereta besenutuk enggau gaya politik kemaya hari tu.
Kelab Penyukung GPS ba dalam siti penerang madahka, lebuh raban nembiak diberi peluang milih pengari, sida ulih meda servis ke diberi perintah nengeri lebih agi sepemanjai timpuh pandemik COVID-19.
“Perintah nengeri endang bebendar deka nyelamatka nyawa rayat sereta nentuka pengidup rayat bejalai baka selama sereta ba tikas ke likun.
“Sarawak entara nengeri ke pemadu jampat bejalaika program meri vaksin di serata menua. Diatu Sarawak benung meri vaksin COVID-19 ngagai nembiak ke beumur 12 nyentuk ke 17 taun,” ku iya madah lebuh nyaut penerang ti dikeluarka Presiden Parti Sarawak Bersatu (PSB) Datuk Seri Wong Soon Koh ti nuduh Gabungan Parti Sarawak (GPS) berumban baban deka ngatur pengawa bepilih nengeri laban irau ati senentang Undi18 deka ngubah pemutus maya pengawa bepilih diatur.
Berebak ari nya, Sarawak ba pun ari bulan Oktober deka meri dos ketiga tauka dikumbai dos penyungkak vaksin COVID-19 ngagai raban rentan.
Sarawak mega udah ngemendarka bantu pandemik ke besai nengah Bantu Khas Sarawakku Sayang (BKSS), ti berengkah enggau pakej ti keterubah (1.0) kena bulan Mac taun siti nyin kemari nyentuk ke pakej ketujuh (7.0) kena bulan Ogos ke udah.
Penyampau semua pakej bantu tu nguna ungkus belanja sepenyampau RM5.3 bilion lalu tu mandangka bungkur pakej ke pemadu besai ke kala diberi sebuah nengeri di Malaysia lebuh betapi enggau COVID-19.
“Inisiatif tu deka nguntungka raban nembiak kelimpah ari pakej bantu ke diberi perintah besai ke mantu ngelempungka tating belanja rayat sepemanjai napi pemar ketegal pengekai igi penyakit nya.
“Lebuh kitai deka nentuka pengelantang rayat, kitai bisi tanggungpengawa nyukung sereta negika konstitusyen ke alai pengawa bepilih mesti diatur sepengudah timpuh Kunsil Nengeri (DUN) udah abis.
“Baka ke ditemu kitai, DUN Sarawak ngelui ari timpuh lima taun maya 6 Jun ke udah,” ku iya madah agi.
