KUALA LUMPUR: Opis Menteri Dagang Temuai, Seni Enggau Main Asal (MOTAC) besedia nerima penatai temuai ari menua luar nyengkaum ari asia barat dalam kandang rampa ti selamat ari pengekai igi penyakit Covid-19.
Menteri nya, Datuk Seri Nancy Shukri madah, MOTAC naka ulih ngemudahka temuai ke menua tu pengudah pintu penama antarabansa dibuka baru ila.
“Temuai ari Asia Barat ngerikodka lima penuduk tetinggi ari sukut agih belanja per kapita kelimpah ngerikodka timpuh pemadu lama diau ba menua tu enti dibanding enggau temuai ari bukai,” ku iya dalam siti penerang.
Ku iya, tu berindik ari aum Nancy begulai enggau pengari pengatur enggau ejensi bejual empat serikat penerebai bilun antarabansa di asia barat dalam nempa kerejasama ngelakuka Malaysia nyadi palan dagang temuai ke dipilih.
Nangkanka nya, entara pekara ti dirandau ba aum iya nya strategi enggau perambu ngelakuka Malaysia dikena matak temuai menua luar baka ari Eropah, Amerika enggau Afrika nengah kaul serikat penerebai bilun diri.
Empat serikat penerebai bilun antarabansa ti nempa kerejasama enggau Malaysia iya nya Qatar Airways, Saudi Arabian Airlines, Air Arabia enggau Emirates Airlines.
