PUTRAJAYA, 8 Oktober: Perintah deka netapka rega siling borong enggau renchit ke baru ungkup kit peresa antigen COVID-19 (peresa kediri) bulan siti nyin ila , ku Menteri Pengawa Dagang Dalam Nengeri enggau Pekara bebelika Barang (KPDNHEP) Datuk Seri Alexander Nanta Linggi.
Iya madahka Opis Menteri Pengawa Dagang Dalam Menua enggau Pekara Bebelika Barang (KPDNHEP) benung bejalaika pansik ba renggat industri sebedau nentuka rega siling borong enggau renchit ke baru ungkup kit peresa nya.
“Perintah udah nerima timbal ari industri bekaul enggau rega ke patut ditetapka ila ngambika ulih meri jamin ngagai bekal ke chukup sereta seruran bisi,” iya bejaku munyi nya ba siti penerang maya Hari Lima.
Perintah sebedau tu netapka rega renchit maksimum ungkup kit peresa antigen COVID-19 (peresa kediri) tu iya nya RM19.90 bagi tetiap set sereta rega borong ditetapka RM16 satu set kenyau 5 September.
Kemari (Hari Empat) Menteri Pengerai Khairy Jamaluddin madahka, rega siling kit peresa tu deka diturunka enda lama agi, sereya dikena meransang mensia mayuh ngambika bejalaika peresa kediri sepengudah mindah meraka nengeri dikemendarka udah tu ila.
Nanta madahka, bisi kira-kira enam juta kit peresa udah dijual ba pasar diatu.
Ku iya madah, KPDNHEP mega udah baum enggau Opis Menteri Pengerai (KKM) ngambika mayuh agi premis tauka kedai nyual kit nya ba pasar ti dijangka deka berengkah dipejalaika ba ujung bulan tu.
“KPDNHEP deka matau rega sereta empas ari pengawa ngemesaika agi pengawa nyual kit peresa tu kelimpah ari ba farmasi enggau klinik,” ku iya madah agi.
Iya madahka, raban pedagang diperansang ngambi nurunka agi rega kit tu tajapan perintah nadai nentuka rega siling ke baru seraya mandangka semangat ‘Keluarga Malaysia’.
