KUCHING: Lima sektor ekonomi agi diripihka nyadi aktiviti ke enda bedau ulih dibuka ba baruh standard atur pengawa (SOP) Pelin Mulaika Pemanah Menua (PPN) Renggat 3 nengeri Sarawak ke udah dikemaru kena 6 Oktober 2021 ke udah.
Lima sektor ekonomi nya nyengkaum aktiviti ba palan pemerindang, karaoke (nyengkaum karaoke enggau diri sebilik), taman tema enggau endur ngelantangka ati, merindang di ‘lounge hotel’ enggau pengawa belagu di luar enggau dalam.
Nitihka SOP (PPN) Renggat 3 nengeri Sarawak ti kepenudi dikemaruka iya nya kena 30 September 2021, panggung wayang tauka Cineplax mega agi bedau ulih dibuka.
Taja pia, ba dalam SOP ti dikemaruka kena 6 Oktober 2021 ke udah, panggung wayang tauka Cineplax bedau temu dikemendarka buka tauka enda.
Kelimpah ari nya, sekeda sektor rama ke mega diripihka entara sektor ke bedau ulih dibuka iya nya baka pengerami rama, pengawa melah pinang ( kelimpah ari pengawa akad nikah, tauka tikah orang ukai pengarap Islam ti udah ditetapka Kaunsil Islam Sarawak ungkup sida ti megai pengarap Islam enggau Unit Pekara Pengarap Bukai (UNIFOR) ungkup sida ti ukai megai pengarap Islam).
Pia mega, pengerami melah pinang enggau betunang, pengawa aqiqah, pengawa besembiang, tahlil, pengerami aniversari, hari pengada, begelumu enggau kaban belayan enggau ke bukai mega enda dikemendarka.
Nangkan ke nya aktiviti massa ti ngaul pejalai tauka pengawa begelumu ti nadai ngemeranka seraka fizikal baka chunto fun ride, marathon, enggau ke bukai mega enda dikemendarka ba dalam atur PPN renggat 3 nengeri Sarawak.
