KUALA LUMPUR, 8 Okt : Langgur Pemansang Malaysia Lumpar ke-12 (RMK-12), ia nya pelin pemansang menua ti baru ngelama lima taun, udah dikemendarka dalam Dewan Rayat ba minggu ti keempat aum nya sepengudah 27 iti opis menteri nyimpul jurai jaku.
Bisi 106 Kaban Parlimen (MP) ari blok perintah enggau blok penyakal bela berundingka RMK-12 ungkup timpuh 2021-2025 sepengudah dibantaika Menteri Besai Datuk Seri Ismail Sabri Yaakob kena 27 September suba.
Kenyau ari Hari Dua ti udah, semua opis menteri udah nyimpul jurai jaku seraya nyaut tanya ari sekeda MP ke bisi datai ngulu aum nya.
Entara pekara ti bekaul enggau tunga kuing menua ia nya pengawa nyendiaka vaksin baka ti dipejurai Menteri Sains, Teknologi enggau Inovasyen, Datuk Seri Dr Adham Baba.
Langgur tu tau mai Malaysia nyadi menua ti mansutka vaksin ungkup mensia mayuh dalam timpuh 10 taun nengah langgur ti dikangau ‘Pelan Hala Tuju Pembangunan Vaksin Negara’ ti deka dipungkal enda lama agi.
Berindik ari langgur nya, MP Tenggara nya madahka Malaysia deka numbuhka Institut Genom enggau Vaksin Malaysia (MGVI).
Aum Dewan Rayat mega berundingka pekara ti bekaul enggau akta orang lunggar umur, lalu pansik senentang akta nya diperambu deka nyadi sebagi ari pengawa nyendiaka Malaysia ngambika nyadi menua ti nyaga pengelantang orang lunggar umur ba taun 2030.
Tuju akta tu diubah kena nyaga pengelantang, ngintu pengelikun sereta ngemeratka agi sukung ngagai orang lunggar, tebal agi dalam ruang bilik enggau komuniti.
Nangkanka nya, isu bekaul enggau pandemik COVID-19 mega seruran diberi perati nyerangkung Surat Setuju Terima ti udah dipansutka perintah ngagai tiga kompeni ti mekal kit peresa kediri COVID-19 ngagai sekula kena 13 September ti udah enggau ungkus kontrak manggai RM9.72 juta.
Pengawa nganjung kit peresa kediri COVID-19 tu dipejalaika semua kompeni ngagai 140 Opis Pelajar Pelilih enggau Opis Pelajar Nengeri ba serata menua kena 25 September suba ngambika dikena sekula ti dibuka ari Oktober ngagai Disember 2021.
Kelimpah ari nya, perintah nadai penanggul meri pemendar ngagai kompeni bejalaika servis internet enggau telekomunikasyen nengah teknologi satelit, tang penetap mesti diberi senentang rega ti patut ngagai rayat. – TVS
