BETONG: Berindik ari ribut bepuput balat ngujungka atap tiga pintu bilik Rumah Panjai Nanga Ajau, Betong tekebu malam kemari.
Pegawai Operasi Balai Bomba enggau Penyelamat (BBP) Betong, Henry Jugah madah, seraban bomba ari Balai Bomba enggau Penyelamat Betong udah dikerah ngagai palan penusah pengudah nerima kangau ngenyit ari Tr Alan Nanga Ajau sentang penusah nya.
“Pengudah raban bomba datai ba palan penusah endang amat atap tekebu dipangka kabut ngujungka tiga pintu bilik No. 5, bilik No.6 enggau No.26,” ku iya dalam siti penerang sehari tu.
Ku iya madah, ruang bilik ke napi penusah tu iya Chela Dempi, Naya Radin enggau Dau Entingang.
Bisi semilan iku raban bomba ti betuaika PBK II Jusmandie Bin Jamaie bejalaika operasyen ngesah penusah nya.
Berebak enggau nya, bomba udah bejalaika pengawa matau gaya penusah enggau ngelalau peranak enda ngena karan dikena nyeliahka sebarang penusah nyadi.
