KUCHING, 5 Oktober: Bisi lima iku peranak menua luar enggau dua iku peranak Malaysia ti beumur 18 nyentuk ke 28 taun udah mujur ditangkap raban polis pelilih Kuching maya Hari Satu.
Ku Tuai Polis Pelilih Kuching, ACP Ahsmon Bajah madah sida tu ditangkap urung pukul 4.30 lemai ketegal bejalaika operasyen judi nengah tali arus ti nadai pemendar.
“Semua sida ke ditangkap tu iya nya pekereja ke bejalaika operasyen judi nengah tali arus kenyau ari dua bulan ke udah sereta digaji RM1,500 sebulan siku,” ku iya dalam siti penerang sehari tu.
Nangkanka nya, semua pekereja tu ngelakuka operasyen judi nya nengah tali arus nguna chara kangau telefon sereta aplikasyen rama baka Whatsapp, Telegram, Wechat, Skype enggau Facebook.
“Ba operasyen nangkap nya, polis udah ngerampas tujuh iti monitor, empat iti CPU, empat iti papan kekunchi, empat iti tetikus, siti modem enggau lapan iti telefon binching mayuh bansa dikena sida bejalaika pengawa judi nya,” ku Ahsmon madah agi.
Dalam timpuh dua bulan, operasyen judi tu teulihka untung manggai RM102,000.
“Kes ditasat ba baruh Seksyen 4 (1) (g) Akta Rumah Judi Terbuka 1953 ti ulih mai ukum enda kurang ari RM50,000 sereta jil enda lebih ari tiga taun,”ku iya.
Kelimpah ari nya, sida tu mega ulih ditinggang ukum mata duit enda kurang ari RM5,000 sereta enda lebih ari RM50,000 ungkup tetiap mesin judi ke dirampas.
Semua saspek peranak menua luar ditan ba baruh Seksyen 51(5)(b) Akta Imigresen 1959/63 sepengelama 14 hari berengkah 5 Oktober 2021 nyentuk ke 19 Oktober 2021 lalu semua saspek peranak menua Malaysia deka direman ba Kort Kuching kena ke 5 Oktober 2021.//
Operasyen nangkap tu digaga nengah ‘Operasyen Dadu’ sepengudah raban polis udah nerima penerang ke bekaul enggau pengawa tu ba Sebuah Rumah Apartmet di Bintawa, Kuching Sarawak.
Ku Ahsmon nerang agi, bisi 20 kes ditangkap dirikodka ba ‘Operasyen Dadu’ dalam timpuh 3 bulan.
