KUCHING, 3 Oct : Bisi lapan iku orang sereta siku deriba bot dipelabaka lenyau ba penusah bot karam di Tasik Barat Laut Pulau Satang Besar kemari udah ditemu selamat urung pukul 5 pagi sehari tu.
Nitihka penerang ti dikeluarka Opis Bomba Enggau Penyelamat Malaysia (JBPM) Sarawak, sida tujuh iku nya ditemu raban orang berikan ke bisi nengah endur nya lalu dibai pulai ke Pulau Satang Besar.
Ku opis bomba madah, orang berikan ke datai ngagai palan jeti telaga air urung pukul 5 mujur tetemuka dua iku orang ba penusah nya.
Berindik ari nya, bisi semilan iku sida selamat ti ditemu ba palan telaga air.
Entara sida tu iya nya Amri Abdullah, Mohd Asri Ibrahim, Muhammad Redzuan Rasul, Zaharudin Yusoff, Mohamad Faris Azizan, Mohd Firdaus Mohd Denan, Mohd. Sahrin Sahir enggau Rais Yahya.
Ku bomba madah agi, bisi siku lelaki ke benama Awang Omar Awang Hamsawi agi lenyau lalu operasyen ngiga enggau nyelamat (SAR) benung chakah dipejalaika.
Kemari, operasyen SAR berengkah dipejalaika sepengudah nerima ripot bekaul enggau insiden nya urung pukul 12.20 ari Ejensi Penerit Adat Maritim Malaysia (APMM).
