BETONG: Raban Bomba ari Balai Bomba enggau Penyelamat (BBP) Betong mujur ngarika sarang indu manyi di rumah endur ngetu perintah Betong, ditu kena Hari Enam.
Tuai Operasyen Pegawai Bomba Kanan 1 (PBKI), Henry Jugah madah, iya empu ngaga sentang pekara nya ngagai BBP Betong.
“Pengudah raban bomba datai ba palan nya, endang amat bisi sarang indu manyi ba pun bungai peninggi 12 kaki belakang rumah endur ngetu perintah Betong,”ku iya madah ngagai TVS.
Ku iya madah, seraban Bomba Betong ari Tim Bravo dikerah ngagai palan endur nya ti ngaul lapan iku bomba betuaika PBK II(KUP) Abang Jamadilhir Abg Mostafa ti nyadi Penyelia Tim Bravo Bersama PBK II (KUP) Wan Majelan PBK II (KUP) Judi Numpang, PBK II(KUP) Mohd Hassim , PBK 11 (Kup) Mokhtar, PBK II (KUP) Prangka Kudang, PB Nickson Asean Akui enggau PBB Anthonio Bagio Salleh.
Operasyen muai sarang indu manyi nya dipejalai ngena chara muru enggau api ba sarang nya nyentuk ke tembu.
Berebak enggau nya, iya ngelalau mensia mayuh ngambika lengkas betelefon ngagai Bomba nyema bisi tepedaka sarang manyi laban bomba bisi prosedur khas muai sarang indu manyi enggau selamat.
