KUCHING: Mensia mayuh dilalau bejalaika tanggungpengawa ke patut nagang sereta ngetuka pengekai igi penyakit rabies.
Sapit Kepala Menteri Datuk Amar Douglas Uggah Embas nyemetak madahka, rayat Sarawak ulih besaup nagang penyakit rabies tu ari majak ngekai sereta nemu chara ke pemadu engkeman dikena nyelamatka mensia lebuh diketup ukui.
Ku iya madah, tetiap iku pengempu ukui enggau mayau mesti seruran nyaga pengerai jelu ke ditupi sida baka meresa pengerai, nerima vaksin nitihka dipinta sereta nerima tuchuk vaksin rabies.
“Enti sema sesiku orang nya diketup ukui, chara ti keterubah iya nya mesti nuchi bekau ketup nya nguna sabun enggau ai beresi, terus nganjung diri berubat sereta minta diberi vaksin rabies.
“Chara tu ulih nyeliahka kita ari ngayanka kelai dirampit penyakit rabies.” ku Uggah madah nengah teks jaku iya ti dibacha Menteri Kaunsil Kandang Menua enggau Pengawa Berumah Datuk Seri Dr Sim Kui Hian lebuh bejadika Program Hari Rabies Sedunia maya Hari Enam.
Uggah madahka, bisi sekeda orang bedau bisi pemereti ati tauka nemu senentang rabies enggau pekara ke patut diaduka lebuh orang bukai diketup ukui tauka jelu tupi bukai ke bisi virus nya.
“Bisi ari sida enda ngelala kelai rabies ba ukui sereta baka ni gaya sesiku orang nya lebuh dirampit rabies.
‘Pia mega, bisi sekeda madahka penyakit rabies tu nyadi ketegal kena sumpah,” ku iya madah agi.
Beduduk ari nya, iya minta mensia mayuh nambahka pemereti ati diri senentang rabies sereta seruran nganjung jelu tupi nerima tuchuk vaksin.
Sida mega ulih bekerejasama enggau dutur, pakar veterinar, pengajar, pengari rayat, pekereja perintah tauka peribit, SSPCA tauka orang bukai ba dala komuniti ngatur program tauka aktiviti nagang sereta ngetuka pengekai rabies.
Bepelasarka rikod penyampau semua ukui di Sarawak iya nya 250,000 iku, 72 kandang menua bisi ngerikod kes rabies sereta bisi 8,210 iku ukui udah divaksin naka 29 September 2021.
